ჩემ შესახებ

 დავამთავრე ილიას სახელმწიფო უნივერსიტეტი , ბაკალავრიატი სპეციალობით  “  დაწყებითი სკოლისა და სკოლამდელი აღზრდის პედაგოგი“ და ჩემი დიდი სურვილია  მეტად გავიღრმავო ცოდნა განათლების სფეროში, შევძლო  საგანმანათლებლო დაწესებულებებში განათლების ხარისხის გაუმჯობესებისთვის საჭირო უნარ-ჩვევების მიღება და დახვეწა, რათა მოვემზადო განათლების სექტორისთვის და მქონდეს კარიერული ზრდის პერსპექტივა.

       ფაქტია, რომ ოცდამეერთე საუკუნე აქტიური ცხოვრებით გამოირჩევა. ყოველდღიურად ხდება ცვლილებები, ადამიანები დღითიდღე  უფრო ინფორმირებულები ხდებიან, სწავლობენ, აღმოჩენებს აკეთებენ და შესაბამისად მოთხოვნებიც უფრო მეტი გაუჩნდათ. ამ მოთხოვნების დასაკმაყოფილებლად კი საჭიროა ცოდნა, შესაძლებლობა, ინფორმაცია, აუცილებელია იყო კომუნიკაბელური და აქტიური,რათა შეძლო ფეხი აუწყო ცხოვრების დინებას, თავად გაუმკლავდე პრობლემებს, მოახდინო შენი ცოდნისა და უნარ-ჩვევების რეალიზება და გახდე წარმატებული. ამისათვის უნდა გქონდეს საკუთარი პროფესიული განათლების მაღალხარისხოვანი ცოდნა, რის შესაძლებლობასაც  ილიას სახელმწიფო უნივერსიტეტი საკუთარი სასწავლო მეთოდებით და მაღალკვალიფიცირებული პროფესორებით  მაძლევს. კმაყოფილი ვარ ილიაში არსებული სასწავლო გარემოთი, რომელიც არ ზღუდავს სტუდენტის უფლებებს და სასწავლო გრაფიკი მორგებულია მათზე. (სტუდენტებზე) რასაკვირველია, მნიშვნელოვანი ფაქტია ის, რომ ილიას სახელმწიფო უნივერსიტეტი საქართველოში არსებულ სახელმწიფო უნივერსიტეტთა შორის რეიტინგით პირველია ინტერნეტ-სივრცეში უნივერსიტეტის საიტზე გამოქვეყნებული ინფორმაციის ხილვადობით. (ამას გვიდასტურებს ვებ-გვერზე არსებული მონაცემები: http://www.iliauni.edu.ge/index.php?lang_id=GEO&sec_id=36&info_id=8141)

       მოკლედ წარმოგიდგენთ ჩემი პროფესიული უნარ-ჩვევების შესახებ. გარდა იმისა, რომ დავამთავრე ილიას სახელმწიფო უნივერსიტეტის ბაკალავრიატი მეცნიერებისა და ხელოვნების ფაკულტეტი, ამასთანავე გავლილი მაქვს სხვადასხვა პრაქტიკები  სააღმზრდელო დაწესებულებებში. პროფესიის არჩევისთანავე აქტიურად ვიყავი ჩართული სხვადასხვა პროგრამებში, ვესწრებოდი სემინარებსა და პრეზენტაციებს, რომლებიც ამ მიმართულებით ტარდებოდა და უპირველეს ყოვლისა წარმოდგენა შემექმნა, თუ რა და როგორ უნდა მეკეთებინა.    პრაქტიკები გავიარე 67-ე ,82-ე  , 202 -ე  და ილია მართლის სახელობის  სკოლაში.  ამ ყოველივემ დამაახლოვა ბავშვებთან და მომცა საშუალება უკეთესად გამეცნო ისინი და გამეგო მათი სურვილები, საჭიროებები და შესაძლებლობები. რის შედეგადაც გავხდი უფრო კომუნიკაბელური,ვისწავლე როგორც ნაცნობ, ასევე უცნობ ადამიანებთან ურთიერთობა, გამომიმუშავდა ახალ სიტუაციასა და გარემოში ადაპტირების უნარ-ჩვევები, მონაწილეობას ვიღებდი ჯგუფურ აქტივობებში, სადაც ცალკეული ინდივიდები ვიბრძოდით ერთი მიზნის მისაღწევად.

     წარმატებული ხარ მაშინ, როდესაც ის გუნდია წარმატებული და გამარჯვებული, რომლის წევრიც ხარ. დარწმუნებული ვარ გუნდური მუშაობის პრინციპი ნებისმიერ სამუშაო ადგილას წარმატებების მომტანი იქნება და აუცილებლად გამოვიყენებ მას, რათა ჩემს მუშაობას ეფექტური შედეგი ჰქონდეს.